Օգոստոս 31ին, հայաշխարհը անակնկալօրէն դրուեցաւ անհաճոյ իրականութեան մը առջեւ՝ այդ օր հրապարակուած հայ-թրքական նախաստորագրուած արձանագրութիւններուն տեսքով:

Ներքոստորագրեալ կազմակերպութիւններս խորապէս մտահոգուած ենք այս արձանագրութեանց մէջ տեղ գտած մեր ազգի ու պետութեան համար սպառնալի դրոյթներով:

Մեր հաստատ համոզումն է, որ այս արձանագրութիւնները կը վիրաւորեն մեր ժողովուրդի արժանապատուութիւնը՝ խնդրոյ առարկայ դարձնելով Հայկական Ցեղասպանութեան իրողութիւնը. կը փոշիացնեն պատմական հայրենիքի գաղափարը եւ կը վտանգեն Արցախի ազատագրական պայքարի բիւր զոհողութիւններով ձեռք բերուած Լեռնային Ղարաբաղի հանրապետութեան ապագան:

Մենք նաեւ մտահոգ ենք, որ այսպիսի համահայկական նշանակութեամբ հարցեր կը տնօրինուին Հայաստանի իշխանութեանց կողմէ, առանց այդ հարցերը համազգային քննարկման արժանացնելու ու հայկական իրականութեան մէջ գործող կազմակերպութեանց կարծիքը իմանալու:

Հայոց Ցեղասպանութեան ճանաչման եւ Հայ Դատի հետապնդման իրաւատէրը համայն հայ ժողովուրդն է՝ ըլլայ Հայաստանի թէ սփիւռքի մէջ: Համայն հայութեան ապագային համար հեռահար հետեւանքներ ունեցող հարցերուն բարւոք արդիւնքի կարելի էր հասնիլ միայն ներքին համերաշխութեան եւ Հայաստան-Սփիւռք ներդաշնակուած համագործակցութեան ճամբով։

Մեր արդար ակնկալութիւնն է, որ Հայաստանի ներկայ իշխանութիւնները ականջալուր ըլլան համընդհանուր ընդվզումի ձայներուն ու անմիջապէս կասեցնեն արձանագրութիւններու ստորագրման գործընթացը՝ ի շահ Հայաստանի ու հայ ժողովուրդի:

Հայ Առաքելական Եկեղեցւոյ Արեւմտեան Ամերիկայի Կիլիկիոյ Թեմ
Հայ Կաթողիկէ համայնք
Հայ Աւետարանական համայնք
ՍԴՀԿ Արեւմտեան Ամերիկայի Վարիչ Մարմին
ՌԱԿ Արեւմտեան Ամերիկայի Շրջանային Վարչութիւն
ՀՅԴ Արեւմտեան Ամերիկայի Կեդրոնական Կոմիտէ